Tað var Ásla Myllá í Sandavági, sum fekk fulla plátu og slapp at snara gekka-hjólinum í kvøld, og hon duldi ikki fyri, at hon var spent.
- Jú, hetta er ótrúliga spennandi, og eg ristist ordiliga, segði hon við gekkavertin, Jan Gardar.
Men, Ásla Myllá var sinnilig, og hon tóktist rólig, tó at høvuðsvinningurin í gekka-spælinum í kvøld var á 200.000 krónur.
Hon valdi at deila upphæddina í teir tríggjar leyparnar - við 70.000 krónum í hvørjum leypi.
Í fyrstu royndini steðgaði hjólið á 10.000 krónum - og einar 2-3 seymir frá reyða leypinum.
- Eg haldi, eg koyri einaferð aftrat, segði hon.
Í aðru royndini steðgaði hjólið á 20.000 krónum, sum eisini hevði verið ein góður vinningur í kvøld.
Men, Ásla Myllá helt fyri, at nú hon endiliga var sloppin ígjøgnum, fór hon eisini at royna triðja møguleikan.
Í triðju og seinastu royndini steðgaði hjólið á 12.500 krónum - og streyk bert ein seym framvið bláa leypinum.
So, her restaði lítið í til tær 70.000 krónurnar, men fryntliga kvinnan í hinum endanum var væl nøgd við vinningin.
- Hatta er fínt, túsund takk fyri, segði Ásla Myllá úr Sandavági.
##med2##
