Aftur í kvøld eru tvær 1/8-finalur í Champions League. Í gjár lógu AC Milan og Arsenal eftirá, meðan Atletico Madrid og favorittarnir úr Bayern Munchen komu víðari.
Barcelona stórfavorittur
Katalanska stórfelagið er stórfavorittur at koma víðari, eftir at teir vunnu 2-0 á Etihad leikvøllinum í Manchester í fyrra dystinum. Tá fekk Manchester City miðverjin Martin Demichelis reytt, tá hann feldi Lionel Messi. Dómarin dømdi brotsspark og so var langur vegur á mál fyri Manchester City.
FC Barcelona hevur ikki fingið spælið at koyra serliga væl í seinastuni. Neymar er fyri atfinningum, meðan Lionel Messi ikki klárar at hanga í góða forminum hjá Cristiano Ronaldo í Real Madrid. Eisini venjarin hjá Barcelona, Tata Martino, er fyri atfinningum í løtuni.
Fyri Manchester City kemur tað væl við, at stjørnu áleyparin, Sergio Aguero, er tøkur aftur. Hann er um nakar maðurin, sum kann koppa Barcelona í egnari holu. Hann hevur fyrr roynt at skorað móti Barcelona fyri Atletico Madrid.
Zlatan longu sent PSG víðari
Tað er ongin ivi um, at Paris Saint-Germain verður at finna í pottinum, tá lutakastið til fjórðingsfinalurnar verður. PSG vann ikki minni enn 4-0 á útivølli í fyrra dystinum móti týska Bayer Leverkusen.
Franska liðið er alt ov gott til, at Leverkusen kann hótta nýríka franska høvðusstaðarfelagið, sum í Zlatan Ibrahimovic hevur ein tann besta spælaran í Champions League í ár.
Champions League 1/8-finalur:
Í dag:
Barcelona (2) – (0) Manchester City (19.45)
PSG (4) – (0) Bayer Leverkusen (19.45)
Í gjár:
Bayern Munchen (2) – (0) Arsenal 1-1 (0-0)
1-0 Bastian Schweinsteiger, 54
1-1 Lukas Podolski, 57
Bayern Munchen vinnur samanlagt 3-1
Atletico Madrid (1) – (0) AC Milan 4-1 (2-1)
1-0 Diego Costa, 3
1-1 Kaka, 27
2-1 Arda Turan, 40
3-1 Raúl Garcia, 71
4-1 Diego Costa, 85
Atletico Madrid vinnur samanlagt 5-1
