Í farnu viku hendi enn eitt arbeiðsóhapp á Faroe Pelagic í Kollafirði. Sambært skaðafráboðanini, sum Arbeiðseftirlitið fekk og sum Miðlahúsið hevur fingið innlit í, bleiv ”...ein maður bleiv fastur og sera illa kleimdur í einari ‘plattapakkimaskinu’”. Sambært vakthavandi á løgreglustøðini í Havn er maðurin nú útskrivaður.
Hetta var 14. óhappi á Faroe Pelagic síðani 7. apríl í 2013.
Hótta við at steingja
Undan hesum óhappinum hevði Arbeiðseftirlitið annars havt fund við Faroe Pelagic, har evnið var ”... gongdin við alt ov nógvum arbeiðsóhappum, sum á ongan hátt kunnu halda fram”.
Sambært skjølunum, sum Miðlahúsið hevur fingið innlit í, søgdu umboð fyri Faroe Pelagic, at har fór eitt miðvíst trygdararbeiði fram, og at tey vildu gera alt fyri, at slík arbeiðsóhapp kundu henda aftur.
- Tey greiddu frá, at tey sjálv mettu at hetta arbeiðið gekk framá, og at hetta sást aftur í, at talið av óhappum var minka, stendur at lesa í skjølunum hjá Arbeiðseftirlitinum. Har stendur eisini, at trygdarumboðið hjá Faroe Pelagic váttaði, at tað var púra rætt og at tað avgjørt vóru framstig at hóma.
Arbeiðseftirlitið gjørdi á hesum fundi greitt, at tey fóru at herða eftirlitið við virkinum, millum annað við fleiri ófráboðaðum eftirlitum. Mettu tey á Arbeiðseftirlitinum í samband við hesi eftirlit, at trygdin ikki var í lagi, kundu tey krevja, at stjórin á Faroe Pelagic kom á staðið, soleiðis at neyðug stig vórðu tikin og trygdin kom í rætt lag.
- Eisini var gjørt vart við, at metti Arbeiðseftirlitið ikki at grundarlag var nøktandi, so hevði Arbeiðseftirlitið á staðnum heimild at nokta atgongd til økir vegna væntandi trygd, herundir eisini møguleikan fyri at steingja virkið, stendur at lesa í skjølunum hjá Arbeiðseftirlitinum.
Hesi eru óhappini:
1
07.04.10 Óhapp nr. 1 í 2010
Arbeiðsóhapp har ein maður bleiv kleimdur milum tveir plattar, og fekk skaða í knæið. Óhappið hendi í transportgongd hjá P/F Samskip
2
02.11.10 Óhapp nr. 2 og 3 í 2010
Arbeiðsóhapp í lastini á Dragon Spring, har Arbeiðseftirlitið fekk fráboðan, umleið klokkan 21.30, hósdagin hin 16 septembur 2010. Tveir mans í lastini fingu skaða av fiskaeskjum, ið duttu av einum platti. Fráboðanin kom frá løgregluni um arbeiðsskaða í lastini á” Dragon Spring”, sum lá við bryggju í Kollafirðið. Arbeiðseftirlitið varð móttikið av tveimum løgreglumonnunum. Teir sum fingu skaða vóru fluttir á Landssjúkrahúsið, áðrenn Arbeiðseftirlitið kom á staðið. Málið sent til fútan.
3
27.05.11 Óhapp nr. 1 í 2011
Arbeiðsóhapp har ein kvinna hekk føst í gafflunum á einum trukki, og bleiv drigin umleið 25 metrar eftir virkisøkinum og havnaøkinum. Skaðin hendi í samband við arbeiði á P/F Samskip, men kvinnanvar í starvi hjá P/F PP Faroe Pelagic.
4
16.07.11 Óhapp nr. 2 í 2011
Arbeiðsóhapp har ein kvinna bleiv kleimd undir einum fullum platti. Skaðin hendi uttanfyri goymsluna hjá P/F Samskip – tað vil siga á felagsøkinum hjá P/F Samskip og P/F PP Faroe Pelagic.
5
22.08.11 Óhapp nr. 3 í 2011
Arbeiðsóhapp har ein maður fekk skaða í hondina, tá ein motorur datt á hondina.
6
16.09.11 Óhapp nr. 4 í 2011
Arbeiðsóhapp har ein maður fekk ein tóman fiskakassa á høvdið.
7
21.09.11 Óhapp nr. 5 í 2011
Arbeiðsóhapp har ein maður fekk skaða í fingrarnar av einari frystimaskinu.
8
20.01.12 Óhapp nr. 1 í 2012
Arbeiðsóhapp har ein maður kleimdi høgru hond í einari sorteringsmaskinu.
9
10.07.12 Óhapp nr. 2 í 2012
Arbeiðsóhapp har ein maður datt fimm metrar niður inni á virkinum hjá P/F PP Faroe Pelagic.
10
09.10.12 Óhapp nr. 3 í 2012
Arbeiðsóhapp har ein maður fekk skaða í hondina, tá hendan kleimdist millum eina eskju og eina jarnstong við eitt flutningsband inni á virkinum hjá P/F PP Faroe Pelagic.
11
09.10.12 Óhapp nr. 4 í 2012
Arbeiðsóhapp har ein maður datt millum fluttningsbond á P/F PP Faroe Pelagic, og fekk skaða í fótin.
12
30.01.13 Óhapp nr. 1 í 2013
Arbeiðsóhapp har ein kvinna bleiv kleimd millum tveir plattar av einum trukki. Arbeiðsóhappi hendi inni á felagsøkinum. Skaðin hendi inni hjá P/F Samskip, men kvinnan var í
starvi hjá P/F Faroe Pelagic.
13
26/07/2013 Óhapp nr. 2 í 2013
Arbeiðsóhapp har ein maður, ið vaskar á virkinum, fekk armin fastan í eitt koyrandi flutningsband, soleiðis at armurin brotnaði.
14
13/08/2013 Óhapp nr. 3 í 2013
Arbeiðsóhapp har ein maður bleiv fastur og sera illa kleimdur í einari ‘plattapakkimaskinu’.
