1.000.632 akfør koyrdu gjøgnum Norðoyatunnilin í fjør, sum er ein vøkstur upp á 11,2% í mun til 2015. Í meðal koyra 2.733 akfør gjøgnum tunnilin um døgnið.
746.070 akfør koyrdu gjøgnum Vágatunnilin, tað vil siga 2.037 akfør um døgnið. Tað er ein vøkstur upp á 9,5%.
Báðir tunlarnir góvu avlop í fjør. Norðoyatunnilin gav eitt avlop á 5,5 milliónir krónur, 700.000 krónur meiri enn í 2015, meðan Vágatunnilin gav eitt avlop á 0,4 milliónir krónur, 100.000 krónur meiri enn í 2015.
Miðalprísurin, sum hvørt akfar hevur goldið í 2016, var kr. 48,51 í Norðoyatunlinum og kr. 42,39 í Vágatunlinum.
Á aðalfundinum vóru nevndirnar afturvaldar. Í nevndini fyri Norðoyatunnilin sita Jens Kári Vilhelm, Heri M. Hammer og Johanna á Bergi. Nevndin skipaði seg við við Jens Kára Vilhelm sum formanni og Hera M. Hammer sum næstformanni.
Í nevndini fyri Vágatunnilin sita Jens Kári Vilhelm, Dánjal T. Thomsen, Mathea Hilduberg og Marita Hentze. Nevndin skipaði seg við Jens Kára Vilhelm sum formanni og Dánjal T. Thomsen sum næstformanni.
