Løgreglan hevur nú tikið ein mann, og hevur skuldsett fyri harðskap. Talan er um eitt harðskapsmál frá seinasta vikuskiftið, har tveir mans komu til ilnar uttan fyri eitt skeinkistað í Havn. Tað endaði við, at annar maðurin varð sligin so illa, at nøsin brotnaði.
Løgreglan hevur nú fingið fatur á gerningsmanninum, og hann situr nú í varðhaldinum. Av tí at talan er um ein útlending, verður málið lagt fyri rættin, áðrenn hann sleppur út aftur.
Boð vórðu eisini eftir løgregluni í morgun. Starvsfólk, sum skuldu til arbeiðis á hotellinum í Runavík, tordu ikki at fara inn, tí ein maður gekk óður inni og rópti og garteraði. Løgreglan varð boðsend og fekk fatur á manninum, sum var farin inn hagar á veg til húsar. Hann varð so koyrdur til húsar, og meiri verður neyvan burtur úr tí.
Í Klaksvík varð løgreglan eisini boðsend at greiða eina ósemju, og tað vísti seg, at tann eini maðurin var so ávirkaður, at hann varð tikin við á løgreglustøðina, har hann varð settur inn.
Tað hevur verið nógvur vindur í gjárkvøldið og í nátt, men løgreglan hevur bara fingið boð um ein stormskaði. Tað var á Tvøroyri, og tað hevði lítið upp á seg, tí talan var um tjørupappm sum varð loysnað á einum húsum. Sløkkiliðið fekk boð um hendingina og tey bjargaðu støðuni.
Í nátt fór brandávaringin frá Salt at boða frá eldi, men tað var ein tekniskur feilur, tí har var eingin eldur, sigur løgreglan.
