Javni, sum fer felagið hjá fólki við menningartarni, og familjum teirra, hevur ikki longur ráð til at varðveita húsið á Hoydalsvegnum, har tey hava hildið til. Tískil hava tey nú selt húsið.
Sigrun Wardum, forkvinna í Javna, soigur at húsið var ikki í ringum standi. Men tað kravdu ábøtur og tað høvdu tey ikki ráð til. Tískil gjørdu tey av at selja húsið og á eykaaðalfundi í Javna leygardagin, varð samtykt at avgreiða søluna. Sostatt er húsið selt, men Javni skal framvegis húsast har, til tey fáa onnur høli, men tað skal vera til leigu. Húsið hjá Javna er í fýra hæddum. Almannaverkið leigar tríggjar hæddir og tey leigumálini halda fram. Leigumálini kravdu eisini nakað av umsiting og tað er eisini ein orsøk til, at tey í Javna gjørdu av at selja. - Tað er ein lætti at vera sloppin av húsið, sigur Sigrun Wardum.
Peningurin, tey fingu fyri húsið, skal ikki í raksturin hjá Javna. Tvørtur ímóti skal hann setast í ein grunn, sum skal stuðla ymsum áhugamálum hjá limunum í felagsskapinum. Sigrun Wardum sigur, at Javni hevur eisini arvað eftir ein lim í Javna og tilsamans verður fæið í grunninum næstan fýra milliónir.
Enn er ógreitt, akkurát hvat grunnurin skal brúkast til, men tey í Javna hava hugsað um at hann skal brúkast til onkusvegna at stuðla uppundir at útvega íbúðir til tey, sum Javni er felagið hjá, kanska saman við Bústøðum.
|
