Herfyri søkti Landsverk eftir leiðara til Byggideildina, og stovnurin hevur nú sett 32 ára gamla Arna Debess Madsen úr Havn í starvið.
Nýggi leiðarin, sum er verkfrøðingur, hevur verið í starvi á Landsverki síðani 2012, tá hann varð settur sum verkætlanarleiðari. Seinasta árið hevur hann verið byggileiðari á stóru verkætlanini at byggja skúladepil í Marknagili, sigur Landsverk.
Byggideildin varðar av flestu bygningum hjá landinum og er byggiharri á øllum nýggjum verkætlanum á hesum øki og í sambandi við undirstøðukervið á landi.
Nakrar verkætlanir eru Skúladepilin í Marknagili, ætlaði H-bygninginum á Landssjúkrahúsinum og nýggi tunnilin til Viðareiðis.
Harafturat eru nógvar smærri verkætlanir, eins og Byggideildin eisini passar bygningar hjá landinum
- Hetta er eitt spennandi starv. Ikki minst tí, at Byggideildin seinnu árini hevur fingið alsamt fleiri og størri uppgávur at taka sær av, sigur nýggi leiðarin hjá Landsverk.
