Hangarurin hjá Atlantic Airways var stak væl egnaður til hátíðarhaldið leygardagin tann 28. mars á flogvøllinum í Vágum, og tú hoyrdi ongan av gestunum, sum vóru komnir aðrastaðni frá, ja onkur var komin heilt norðan úr Klaksvík, siga eitt orð um at hepnari hevði verið, um flogvøllurin var nærri.
Øll vóru komin at fegnast um okkara tjóðarflogfelag, sum nú hevur megnað at kappast á altjóða marknaðinum og á altjóða støði í 10 ár, og sum skiltist á leiðslu og myndugleika eru góðar vónir um eitt komandi tíggjuára skeið á føroyskum veingjum.
Framsýning
av tekningum
Har var ríkiliga nógv pláss til framsýningina av tekningunum hjá børnunum, sum høvdu latið inn tekning til teknikappingina, og hin hálvan av bygninginum var so karmur um undirhald sum Rasmus Magnussen stóð fyri, væl fyriskipað má sigast, borð við alskyns ábiti og drekkilsi, tó ikki sterkari enn vín og røðarapallur var sjálvandi eisini, har menn fluttu fram røðu, bæði høgur sum lágur.
Tað tóktist tó sum vóru fólk ikki beinleiðis komin at hoyra røður, men heldur at fegnast um at okkara tjóðarflogfelag hevði megnað at lívbjarga sær í hørðu kappingini við onnur flogfeløg hesi 10 árini á egnum veingjum, og nú er ment so væl, at tað víðkar sambandið við útheimin, fyrst nýggja summarrutan til Skotlands og so Noreg einaferð í skjótu framtíð, og so møguliga eisini við nýggjum flogfari, til tess rættiliga at røkka tørvinum sum er og verður.
Heirðað við gyltari nál
Tað hava verið turbulent ár, skiltist, men eisini má sigast, at vit í dag hava eitt flogfelag á professionellum støði sum bæði tolir turbulens, undanvind og mótvind, og á 10 ára degnum hjá flogfelagnum kundi tí eisini stjórin heiðra fleiri av sínum starvsfólkum fyri trúgva tænastu í felagnum við eini gyltari nál.
Hetta vóru starvsfólk á øllum økjum í felagnum, flogternur, flogskipari, roknskaparleiðari, skrivstovufólk, tekniskur leiðari, ja øll tey sum dagliga tryggja okkum regluliga sambandið við útheimin á føroyskum.
Eitt róp frá Magnusi
Heiðranin av starvfólkunum kundi ikki fremjast fyrr enn flogfarið hevði lent úr útlondum, og Regin Vágadal slapp heldur ikki at royna seg av somu orsøk. Men tá alt var liðugt í hangarinum, leitaðu øll sær út, har alt varð gjørt klárt til styrkiroyndina hjá Regini Vágadal.
Rasmus Magnussen var eisini konferencier úti á vøllinum, og sigast má at hesin maður fekk rættiliga lív í okkara politisku umboð, tá ið tað gekst nakað strevið hjá Regini at fáa flogfarið á rull.
Eitt róp frá Rasmusi var nóg mikið til at fáa fyrst Ivan Johannesen, landsstýrismann, at taka hendur úr lummum og loypa úr mannamúgvuni, síðan Jørgen Niclasen, løgtingsmann, honum á baki Suna Jacobsen, løgtingsmann, at hjálpa kempuni at fáa glið á.
