Bankin barberar heili 1,25 prosent oman av 1. veðrættarlánum. Lægsta bústaðarrentan fer úr 5,25 prosentum niður í 4,0 prosent.
Eisini verður tað bíligari at hava realkredittlán í Eik Banka. Sonevnda bidragið á realkredittlánum lækkar úr 1,9 prosentum niður í 1,7 prosent.
– Vit hava nú tillagað bygnað og útreiðslustøði bankans soleiðis, at vit eru før fyri at bjóða kundum okkara væl bíligari bústaðarlán. Okkara langtíðarætlan er m.a., at fyrimunir skulu raka so breitt sum gjørligt, og tí hevur eitt nú Netbankin altíð verið ókeypis fyri allar privatkundar í Eik, eins og vit hava fleiri aðrar ókeypis tænastur, sigur Súni Schwartz Jacobsen, forstjóri í Eik.
Bankin vísir á, at lækkingin av 1. veðrættarrentuni merkir eitt nú, at ein familja, sum situr við eini sethúsaskuld upp á 1,2 milliónir krónur, sparir umleið 15.000 um árið í rentuútreiðslum.
Innlánsrentur eru eisini fevndar av rentulækkingini. Rentan á einstøkum innlánskontum lækkar við upp til 0,25 prosentstigum.
Rentulækkingin fær gildi 15. mai 2013, meðan bidragið á realkredittánum lækkar 1. juli, tá næsta realkredittgjalding fer fram.
