Hálvársroknskapurin hjá Eik Banka vísir eitt avlop upp á 25,2 milliónir krónur eftir skatt. Fyri skatt er úrslitið 31,1 milliónir krónur. Fíggjarstøðan javnvigar við 8,1 milliardum krónum og eginpeningur bankans er 1,3 milliardir krónur.
Tað boðar bankin frá í skrivi.
- Fyrra hálvár hjá Eik Banka hevur hilnast væl. Úrslitið vísir, at vit eru á rættari kós, og Eik heldur fast við útlitini um avlop fyri árið 2012, sigur Súni Schwartz Jacobsen, forstjóri í Eik Banka.
Í stuttum kann nevnast, at:
Úrslitið áðrenn skatt, regulering av kapitalpørtum og niðurskrivingum er eitt avlop á 73 milliónir krónur.
Minkingin av útlánum bankans er mest sum steðgað
Innlán eru økt við 102 milliónir krónur síðan árslok 2011
Fyrra hálvár hevur bankin framt niðurskrivingar fyri 46,4 milliónir krónur.
Niðurskrivingar av útlánum, íroknaðar 18 milliónir krónur í virðisjavnan av lánum og úrslit av fyribils yvirtiknum ognum eru tilsamans 43 milliónir krónur.
Solvensurin við hálvárið er 22,5 prosent
Yvirdekningur í mun til lógarkravda gjaldførið er 279,1 prosent, tað er meira enn 3 ferðir lógarkravda minstamarkið
Framhaldandi útlit um positivan rakstur fyri árið 2012
Útlánini eru 4,9 milliardir krónur og eru á sama støði sum við ársenda 2011. Tískil er minkingin í útlánunum steðgað. Harafturímóti eru innlánini 6,4 milliardir krónur og sostatt eitt vet hægri enn við ársenda 2011.
Solvensurin er 22,5 prosent og likviditeturin næstan 3 ferðir lógarkravda minstamarkið. Sostatt eru bæði solvensur og likviditetur hjá bankanum góður, og tøkur peningur er til at afturrinda 1 mia. kr., sum er eftir av statsveðhildnu skuldini.
Nettorentuinntøkurnar eru lægri enn sama tiðarskeið í fjør og kemst hetta av minking í útlánunum í 2011 og einum lægri rentumarginali enn higartil í 2012. Somuleiðis eru útreiðslur til starvsfólk og umsiting minkaðar fyrra hálvár 2012 í mun til fyrra hálvár 2011.
Niðurskrivingar
Bankin hevur fyrra hálvár framt niðurskrivingar fyri 46,4 milliónir krónur Rakstrarútslitið er tí framvegis nakað merkt av niðurskrivingum upp á ognir, sum eru yvirtiknar frá gamla Eik Banka.
