Ein vøkur slupp kann kennast líka dragandi, sum ein eiggilig kvinna, heldur listamaðurin Ian Luid, sum fyri løtu síðani lat upp listaframsýning í Smiðjuni í Lítluvík
Eisini á hesi framsýningini gongur sjólívið aftur sum tema í málningunum hjá listamanninum Ian Luid, ið er úr Fuglafirði. Av teimum í alt 24 málningunum hava teir seks sjólívið sum myndevni, og eru teir allir nýggir og málaðir til júst hetta høvi.
- Eg verði neyvan nakrantíð liðugur við at finna myndevni í sjólívinum. Serliga eru tað gomlu sluppirnar, sum kunnu vera so ótrúliga estetiskar, at eg fái eitt sog í búkin av at hyggja at teimum, sigur Ian Luid.
Hóast føroyska náttúran og sjólívið mest sum er vorðið eitt eyðkenni fyri Ian Luid sum listamann, er hann ikki bangin fyri at ganga nýggjar leiðir. Á hesi framsýningini roynir hann seg til dømis fyri fyrstu ferð av álvara við nøkrum abstraktum málningum.
- Eg havi spælt mær eitt sindur við tað abstrakta fyrr, men ongantíð so gjøgnumført, sum hesuferð, sigur Ian Luid, og sipar til tríggjar abstraktar málningar, ið millum annað ímynda mytiskar verur. Hann dylur ikki yvir, at hann er spentur uppá, hvat fólk fara at halda um hesa nýggju síðuna av hansara list.
Framsýningin hjá Ian Luid í Smiðjuni er opin til kl. 23 í kvøld og annars fra 14 til 18 til og við mikudagin.
