Í síni ársfrágreiðing, sum telir fimm blaðsíður, endurtekur formaðurin í Føroya Fiskimannafelag ikki minni enn fimm ferðir møguleikan at leggja fiskiskipaflotan - Verða fiskimenn koyrdir í land, tí teir vísa til sáttmálan, fer hetta at fáa álvarsligar fylgjur. Fiskimenn eiga ikki at verða bangnir fyri at leggja flotan. Hetta skal ikki verða nýtt sum nøkur hóttan, men skal takast í fullum álvara.
Tað segði Jan Højgaard, formaður í Føroya Fiskimannafelag, á landsfundi fríggjadagin.
Í ársfrágreiðing formansins, sum telir fimm síður, verður í minsta lagi fimm ferðir nevnt, at makka reiðarar, stovnar ella tað almenna ikki rætt, eigur fiskimaðurin at leggja flotan.
Fyrstu ferð, Jan nevnir henda møguleika, er í brotinum um ALS og vantandi útgjald til fiskimenn.
- Vit eiga at gera bart, tá ið slíkar beistagerðir verða framdar móti okkum og leggja flotan beinanvegin, um ikki úrslit spyrst burtur úr.
Í øðrum umfari snýr málið seg um lóggávu um trygd og Vinnumálaráðið.
- Vinnumálaráðið fær valið ímillum at syrgja fyri nøktandi trygd - ella at arbeiðið verður niðurlagt.
Í triðja umfari er talan um sáttmálarnar.
- Vit eiga ikki at verða bangnir fyri at leggja flotan.
Í fjórða umfari snýr málið seg eisini um at halda sáttmálan.
- Fiskimannafelagið má seta hart ímóti hørðum og leggja skipini. Fyrr enn tað er gjørt, koma vit ikki víðari.
Og í fimta lagi er talan um viðurskifti, tá ið fiskimenn koma til skaða og hava brúk fyri hjálp.
- Allir eru ikki nøgdir við viðurskiftini, og onkur hevur kravt, at flotin verður lagdur í stundini.
Líkt er tí ikki til, at hetta verður einastu ferð, at okkara fiskiskipafloti kemur at liggja.
