Borgarar í Tórshavn hava altíð stuðlað uppundir nýggj átøk á skúlaøkinum. Hóast hetta, í mesta mun, átti at verið ein landsuppgáva, so hava lærarar, skúlaleiðslur, foreldur, skúlastýrislimir og annað gott fólk, í felag lyft manga uppgávuna og sett nýggj tiltøk í verk.
Sum skúlastýrisforkvinna í 4 ár í Kommunuskúlanum og við royndum í millumtjóða nevndum í m.a. Norðurlandaráðnum, havi eg í verki víst, at eg eri ikki bangin fyri at taka ábyrgd og eri fús at bjóða meg framm á politiska vígvøllin at virka fyri at skapa størri trivnað og gera kommuna til eitt betri pláss at búleikast í.
Her eru bert nøkur dømi, ið eg stuðli fult og heilt:
X Musikksúla Miðnám – eitt tilboð til dugnaligar tónleikarar, ið varð byrjað av einstaklingum á Tórshavnar Musikkskúla. Ein succes við altjóða formati, byrjað av góðum kreftum, her í mentanarbýnum Tórshavn.
X Listaflokkur í Tórshavnar Kommunuskúla, har ið børnini hava fingið eina betri fatan av mentan og list í øllum sínum ríkidømi og margfeldni.
X Litir í leiki – enn eitt tilboð fyri at fjálga um kreativu evnini hjá børnunum. Hetta er í stóran mun eisini til at betra um innlæringina.
X Fótbóltsflokkur í framhaldsdeildini – vit fegnast um, at ungdómar í framhaldsdeildini verða hildin til í skúlanum, so tey bókliga ikki verða eftirbátar. Tilboðið skal – nú royndartíðin hevur víst okkum at hetta riggar, vera enn fleiri í boði.
X Fjarundirvísing – við tí framkomnu tøkni, ið dag er til taks, hava átøk verið gjørd, so lærari og næmingur í m.a. Stóru Dímun kunnu samskifta. Hetta er jaligt tiltak og er bert at stuðla hesum enn meira.
Øll hesi nevndu eru sett í verk av framfýsnum lærarum, leiðslum og foreldrum, ið vilja styrkja og stuðla tí sera týdningarmiklu menningina hjá skúlaungdómi.
Hesi fólk eru dýrgripar fyri okkum í høvuðsstaðnum.
Eg vil vera ein sterk kvinnurødd í Býráðnum, ið veit, at framskygni og miðvíst arbeiði ber fram á leið.
Týdningarmesta virði eru okkara børn og ungdómar og tey ið dagliga starvast við okkara framtíðar tilfeingi.
X Andrea Heindriksdóttir - so hendir nakað
