Tí risikoin at blíva valdur er so stór, at tað risikeri eg ikki.
Tað sigur Tórbjørn Jacobsen, fyrrverandi løgtings-, fólkatings- og landsstýrismaður fyri Tjóðveldi.
Í Tjóðveldi siga tey í dag, at listin við teimum higartil 28 valevnunum ikki enn er endaliga liðugur. Seinasta freist at lata listan inn er týsdagin. Tí hevur verið gitt, at Tórbjørn Jacobsen verður á listanum kortini, hóast hann hevur boðað frá, at hann ikki stillar upp.
– Eg veit ikki hví, fólk blíva við at spyrja. Men eg boðaði longu frá á fyrsta uppstillingarfundi, at eg stilli ikki upp, sigur Tórbjørn Jacobsen.
– Eg trívist so væl í mínum starvi í tí maritima umhvørvinum, at eg tími rætt og slætt ikki verða løgtingsmaður. Tað er fantastiskt aftur at arbeiða millum fólk í maritima umhvørvinum, sum er eitt heilt annað fólkaslag, sigur fyrrverandi landspolitikkarin, sum sigur seg stórtrívast uttan fyri landspolitiska leikpallin.
Tórbjørn Jacobsen gjørdist løgtingsmaður í 1998, tá hann tók sæti sum varamaður fyri Signar á Brúnni, sum tá var landsstýrismaður. Hann tók við sum landsstýrismaður í 2000, tá Signar á Brúnni fór frá sum landsstýrismaður. Tórbjørn Jacobsen varð valdur á ting í 2002, í 2004 og í 2008. Hann stillaði ikki uppaftur á valinum í 2011. Hann var fólkatingsmaður sum varamaður fyri Høgna Hoydal frá 2001-2004.
Umframt at vera havnarmeistari í Runavík, so er Tórbjørn Jacobsen eisini býráðslimur í Runavíkar kommunu.
