Tveir ungir føroyskir menn, Arthur Ryggstein og Bjarti Mellemgaard Henriksen, sum hava verið saknaðir í Danmark síðan týsdagin, eru nú komnir afturíaftur í øllum góðum.
Tað váttar pápi Bjarta Mellemgaard Henriksen, Niels Mellemgaard, fyri In.fo. Hann sigur, at báðir teir ungu menninir eru í svenska býnum, Malmø, nú teir eru komnir afturíaftur.
Arthur Ryggstein og Bjarti Mellemgaard Henriksen skuldu ætlandi við flogfarinum hjá Atlantic Airways heim til Føroyar týsdagin á middegi. Teir komu tó ongantíð umborð á flogfarið.
Tað seinasta, sum nakar hoyrdi frá teimum, var, at ein vinmaður tosaði við annan teirra, tá teir vóru á veg til flogvøllin í Kastrup. Siðan hevði eingin hoyrt nakað til teir.
Nú er so greitt, at ungu menninir eru komnir afturíaftur í Malmø, og sambært pápa Bjarta Mellemgaard Henriksen hava teir tað gott.
