Higartil hevur Edmund Joensen havt ein útbúnan journalist í starvi, men hesin er nú farin í kunningarstarv hjá Tórshavnar kommunu.
Í starvslýsingini hjá Edmundi, sum er at síggja á heimasíðu hansara, www.edmundjoensen.fo stendur, at talan er ikki um fast starv, tí ætlanin er, at ein ella fleiri uttanhýsis samskiftarar skulu kunna loysa uppgávurnar. Og so nevnir hann uppgávur so sum strategiska sparring um samskiftisfakligar og politiskar spurningar, at menna hugskot á samskiftisøkinum, vera við til at fyrireika røður í samstarvi við Edmund og at menna heimasíðuna.
Av førleikum væntar Edmund Joensen sær, at viðkomandi hevur góð samstarvsevni, royndir frá fjølmiðlaarbeiði, nøs fyri teirri góðu søguni, arbeiðir skjótt og er kortini nágreiniligur
Av útbúgving væntar Edmund sær, at viðkomandi hevur samskiftisliga, samfelagsliga ella aðra líknandi útbúgving - og samsýning verður eftir avtalu.
Sum fólkatingsmaður fær Edmund Joensen játtan at seta fólk at hjálpa sær. Tað fáa løgtingsfólk ikki, men Edmund røkir bæði løgtings- og fólkatingsstarvið fulla tíð, so kanska samskiftisráðgevin hjá fólkatingsmanninum eisini kann hjálpa løgtingsmanninum.
Hin føroyski fólkatingsmaðurin røkir eisini bæði størvini - og hann hevur eina heila umsiting saman við ørðrum av grønlendsku fólkatingsumboðunum, sum Fólkatingið rindar fyri.
