FORMAÐUR sambandsfloksins og fyri tað eisini sambandsblaðið Dimmalætting hava sjálvandi loyvi til at speireka og gera gjøldur burtur úr tí arbeiði, sum aðrir persónar hava gjørt í hesum máli, eitt nú samráðingarleiðarin. Tað er ov bíligt, tað er ósakligt, tað er tendensiøst og tað er ósolidariskt við restini av Føroyum, nú tá málið loksins er loyst, og tað eru aðrir enn Edmund Joensen, sum hava fingið tað seinasta uppá pláss, at eftirrationalisera og siga, at úrslitið gjørdist ikki nóg gott. Tí hetta er eitt postulát - hetta er nakað, sum man bara kann slongja út uttan at hava eitt einasta eitt prógv fyri tí. Hetta er so mikið burturvið, at man loyvir sær at seta stórt spurnartekin við leiklutin hjá undanfarna løgmanni í hesum álvarsmáli. Væl vitandi, at hann eisini hevur fingið okkurt av skafti, so er tað tó eisini ein sannroynd, at løgmaður spældi við eld og kundi einsvæl verið orsøkin til, at hetta málið varð mist á gólvið. Taktikkurin hjá løgmanni var nevniliga ein konfrontatiónskós móti bretum, eisini tá hesir høvdu slept sínum fullkomiliga órímuliga kravi langt inn á landgrunnin. Løgmaður førdi ?kalt kríggj? móti bretum og roknaði so við at fáa somu bretar at geva seg politiskt og geva honum eina avtalu, sum er betri enn verandi avtala. Eisini her kemur vantandi logikkurin hjá formanni sambandsfloksins til sjóndar. Soleiðis samráðist man ikki - soleiðis røkkur tú ikki semjum. Eftir okkara tykki hevði krav hansara um politiskan fund uttan iva ført til, at málið endaði í Haag. Og tá vistu vit ikki, um vit vóru keypt ella seld. Og samtíðis varð lok lagt á allan oljuútviklingin um okkara leiðir komandi fimm árini.
FORMAÐUR sambandsfloksins hevur rokkið sínum máli. Hann hevur við ósakligum og reint persónligum niðurstøðum niðurgjørt arbeiðið hjá øllum øðrum, sum hava verið við í hesi sakini. Uttan uppá nakran máta at kunna prógva at siga, at vit høvdu fingið meira burtur úr, um hansara leið varð fylgt - í so álvarsligum máli - er formanni sambandsfloksins og flokkinum sum heild til lílan sóma. Soleiðis arbeiða ikki ábyrgdarfullir politikkarar. Hetta kann best lýsast við myndini um at stinga sínar egnu í ryggin. Hvørki meira ella minni. Bara tað at siga, at framtíðar søgumenn eru hansara sannleikavitni, vísir, hvussu langt úti fyrrverandi løgmaður er í hesum máli. Við tí hevur hann máað støðið undan teimum varðum, ið hann sjálvur metir seg hava laðað í síni løgmanstíð. Kanska søgan fer at fortelja okkum okkurt, sum avdúkar veruliga leiklut hansara í hesum máli.
