- Tað er alla æru vert, at Kaj Leo Johannesen umsíðir kemur út úr skápinum og viðurkennir, at hann er loysingarmaður og ikki sambandsmaður.
Tað sigur fólkatingslimurin Edmund Joensen, fyrrverandi formaður í Sambandsflokkinum, og sipar til dreymin hjá løgmanni, sum boðaði frá í ólavsøkurøðuni, at hann vil hava trý sjálvstøðug lond í ríkinum.
Edmund Joensen heldur, at Kaj Leo Johannesen má taka avleiðingarnar, og fara frá sum formaður í Sambandsflokkinum, tí eingin munur er á hansara politikki og politikkinum hjá Fólkaflokkinum.
Annars er tað upp til politiska baklandið hjá Sambandsflokkinum at velja ein nýggjan formann, sum er sambandsfólk.
- Vit hava frammanunan nóg nógvar loysingarflokkar, sigur Edmund Joensen.
