- Eg dugi ikki at síggja nakran vanda.
Edmund Joensen, fólkatingsmaður, heldur ikki, at kæran hjá Sea Shepherd til ES Kommissiónina um grindadráp, fer at fáa nakrar avleiðingar.
Hann sigur, at hann hevur ikki hoyrt eitt orð um hetta nýgga átakið hjá Sea Shepherd.
Hinvegin staðfestir hann, at Sea Shepherd er ein felagsskapur, sum ikki verður tikin í álvara longur, yvirhøvur, og tískil ivast hann í, hvat ES fer at gera við málið.
- Altjóða samfelagið lurtar ikki eftir Sea Shepherd longur.
Kortini heldur hann, at málið má takast í álvara og tískil ætlar hann sær at kanna málið.
Edmund Joensen staðfestir annars, at altjóða samfelagið hevur mestsum slept allari mótstøðu ímóti grindadrápi.
- Vit hava prógvað, at talan er um burðardygga veiði. Harafturat hava vit bøtt munandi um drápsháttin og síðani er almenna mótstøðan ímóti grindadrápi tagnað.
Kortini heldur fólkatingsmaðurin, at er Sea Shepherd farin í lógbøkurnar í eini roynd at steðga grindadrápi, eigur tað eisini at bera til hjá okkara løgfrøðingum at vísa tí aftur við løgfrøðini.
