Men hetta er líka stórt blúff, sum tað ið Edmund Joensen saman við Kaj Leo Holm Johannesen leveraði undir báðum valstríðunum – til fólkatingsvalið í september í 2011 og løgtingsvalið í oktober 2012 – um at blokkstuðulin skuldi hækka millum 130 og 200 milliónir krónur.
– So leingi Føroyar og Danmark hava dýr felagsmál, er støddin á blokkinum »brandaktuell«, segði Edmund Joensen, sum heldur fast við, at danski blokkurin til Føroya eigur at verða »normaliseraður« aftur, sum kann kallar tað.
Tað merkir, at blokkurin skal hækkast 150-200 milliónir krónur. Hetta er upphæddin, sum blokkurin er lægri um árið av tí, at hann varð frystur fastur fyrst í hesi øldini.
Landsstýrið hevur samráðst við donsku stjórnina um at hækka blokkin, men tað vildi danska stjórnin ikki hoyra talan um.
Men Edmund Joensen vónar, at tann næsta danska stjórnin ikki verið so stívrend ímóti føroyingum, sum hendan stjórnin er.
Tí vónar hann, at Vinstriflokkurin fær stjórnarvaldið aftur í Danmark eftir næsta fólkatingsval.
– So skulu tit bara síggja, sigur Edmund Joensen.
Hóast Edmund stríðist sítt stríð, so er tað eingin annar, sum trýr honum. Heldur ikki hansara egni formaður, sum langt síðani hevur slept hesum vallyfti. Hann hevur enntá givið eini komandi samgongu signal um, at hon heldur ikki skal broytta blokkstuðulin, og tí hevur hann gjørt eina avtalu, sum røkkur inn í næsta valskeið.
Eingin annar flokkur í Føroyum trýr upp á møguleikan at hækka blokkstuðulin aftur, og Vinstri flokkurin í Danamrk hevur alment boðað frá, at hanner eins kargur, sum Javnaðarflokkurin danski.
– Tað er Fólkaflokkurin, sum hevur staðið fyri »blokkminkingarpolitikkinum«, og Fólkaflokkurin og Jørgen Niclasen eru alt og eitt hjá løgmanni. So góði Edmund, her er eingin vón, hvørki í Føroyum ella í Danmark – ella millum vinir og fíggindar.
– At halda fast við hatta vallyftið er at bluffa og harvið at halda veljaran fyri gjøldur.
