Hóast ferðaútreiðslurnar helst verða hampuliga stórar, so er lítil ivi um, at talan er um spennandi lutakast, sum EB/Streymur fekk í dag.
Føroysku meistararnir trektu Apoel Nicosia av Cypros, og fyrri dysturin verður spældur í Føroyum tann 15. juli. Seinni dysturin verður spældur á Cypros tann 22. juli.
- Cypros hevï í fjør eitt lið, sum var heilt nær við at spæla seg víðari úr bólkaspælinum í Champions League, sigur Sigfríður Clementsen, sum er venjari hjá EB/Streymi.
- So tað er einki at ivast í, at støðið er høgt, men hinvegin hevur føroyska landsliðið fingið góð úrslit móti Cypros.
- Men á felagsstigi, so er einki at ivast í, at Cypros hevur sterk lið. Og seinnu árini eru fleiri útlendskir profilar keyptir til feløgini. Eg veit ikki, hvussu hópurin hjá Apoel Nicosia sær út, men tað fara vit so at seta okkum inn í.
- Hinvegin er einki at ivast í, at bara tað at fara til Cypros, er ein stór avbjóðing í sjálvum sær, sigur Sigfríður Clementsen.
