Í finaluni møttust tey bæði liðini, ið endaðu ovast í landskappingini í fjør, HB og EB/Streymur, eftir at tey høvdu vunnið hvør sín innleiðandi dyst leygardagin, sum vóru ímóti ávikavist KÍ og NSÍ.
Bara eitt mál kom fyri steðgin í finaluni, og tað skoraði Pætur Dam Jacobsen, so EB/Streymur var á odda 1-0 í hálvleikinum. Síðani javnaði Fróði Benjaminsen fyri HB við brotssparki, áðrenn Bárður Olsen bleiv spældur leysur og smekkaði bóltin í málið til 2-1, ið gjørdist úrslitið av dystinum.
Aftaná kundu so spælararnir hjá EB/Streymi lata seg heiðra mitt á vøllinum í Klaksvík, har formaðurin í KÍ, Tummas Lervig, handaði liðformanninum hjá EB/Streymi, steypið.
Í bronsudystinum stóð á jøvnum 1-1 eftir 90 minuttir, so har mátti brotssparkskapping til, áðrenn ein vinnari kundi kjósast. Einki mál kom í fyrra hálvleiki, men stutt eftir steðgin skoraði Kristoffur Jakobsen til 1-0 fyri KÍ, og tá smáir 20 minuttir vóru eftir, javnaði Christian Høgni Jacobsen fyri NSÍ.
Sostatt máttu brotsspørk skjótast, og her máttu ikki færri enn níggju skjúttar til, áðrenn avgerðin var fallin, og tá endaði tað við, at NSÍ vann 8-7.
Fleiri brotsspørk
Hetta við brotsspørkum var forrestin eisini lagnan hjá KÍ í innleiðandi dystinum ímóti HB, tí tá stóð eisini á jøvnum eftir vanligu tíðina. Kristoffur Jacobsen og Hjalgrím Eltør løgdu KÍ á odda 2-0, áðrenn fyrst Kári Nielsen minkaði um munin fyri HB og síðani Fróði Benjaminsen javnaði við brotssparki.
Av tí at tveir av spælarunum hjá KÍ brendu síni brotsspørk, meðan allir hjá HB skoraðu, endaði hesin dysturin tískil 6-3 til HB, sum tí kom í finaluna. Annars gott avrik av uppflytaranum, KÍ, at liðið megnaði at halda tveimum av ovastu liðunum í fjør í 90 minuttir og ikki fall, fyrr enn brotsspørkini skuldu skjótast.
Í hinum innleiðandi dystinum spældu EB/Streymur og NSÍ, og her vann EB/Streymur 2-1. Fyrst skoraði Arnbjørn T. Hansen til 1-0 fyri EB/Streym, áðrenn ein av nýggju spælarunum hjá NSÍ, Hugues R. Nanmi, javnaði til 1-1. Sigursmálið hjá EB/Streymi skjeyt Arnar Dam.
