Í bretskum miðlum hevur tað í fleiri dagar verið roknað sum veruleiki, og í dag varð tað staðfest. Angel Di Maria skiftir úr Real Madrid til Manchester United, og við hesum verður hann dýrasti spælarin í Bretlandi.
£59,7 mió mátti Manchester United leggja á borðið fyri at fáa argentinska spælaran, og hetta er altso bretskt met.
- Eg eri ovurfegin um at sleppa at spæla við Manchester United. Eg havi havt nøkur framúr ár í sponskum fótbólti. Fleiri feløg sýndu áhuga fyri mær, men skuldi eg fara úr Real Madrid, so var Manchester United einasta felagið, sum kundi koma upp á tal fyri mítt viðkomandi, segði Di Maria, tá sáttmálain varð undirskrivaður.
Sáttmálin við Di Maria er galdandi í fimm ár.
