Um tað vóru fleiri til konsertina hjá Dynamit enn hjá Ronan Keating skal ikki sigast. Men tey vóru ikki færri.
Tað er við at blíva fast, at á hvørjum Summarfestivali skal Dynamit spæla sína síðstu konsert. Hesa ferð varð tað tó ikki lovað, at hon var tann síðsta - uttan iva til stóra gleði til tey mongu, sum hvørt ár hava Dynamit sum hæddarpunkt á Summarfestivalinum.
Fólkið elskar teir og vil hava teir. Í 1½ tíma rungaðu allir teir kendu gomlu slagararnir hjá stuttliga klaksvíksbólkinum úr hátalarunum. Tá 'síðsti' sangur var sungin, kundi fjøldin ivaleyst hoyrast niðan á Klakk rópa 'Eykanummar, eykanummar'.
Tað fingu tey sjálvsagt, og endaðu Dynamit brakið við 'Grøv nummar 13'.
Um Dynamit verður aftur á næsta árs Summarfestivali, kann man bara gita seg til. Men um tað verður upp til tey mongu túsund, sum sungu og róptu við í kvøld, so skulu teir nokk vera høvuðsnavn øll trý kvøldini næsta ár.
