Eitt Boeing 737-800-flogfar lendi í kvøld trygt í lufthavnini í Dubai, eftir at eldur var komin í ein av motorunum, meðan flogfarið var á flogi.
Tíðindastovan Reuters veit at siga, at orsøkin til eldin, var, at flogfarið rendi á ein fugl.
Tað var, tá flogfarið hjá FlyDubai fór á flog av Tribhuvan-flogvøllinum í Katmandu, høvuðsstaðnum í Nepal, at flogfarið rakti fuglin.
Við flogfarinum vóru 167 ferðafólk.
Eftir tilburðin helt manningin, at ráðiligt var at halda fram við ferðini til Dubai.
- Okkara roynda manning fylgdi ásettu mannagongdunum og helt fram við ferðini, tá tey høvdu staðfest, at motorurin riggaði, sum hann skuldi.
Tað sigur eitt talsfólk fyri flogfelagið, FlyDubai í Sameindu Arabisku Emiratunum, sum tíðindastovan Reuters endurgevur.
Flogfarið, sum lendi nakað eftir midnátt lokala tíð í kvøld, verður nú kannað á flogvøllinum í Dubai.
