Fyri gott og væl tveimum árum síðani helt man, at Didier Drogba hevði skotið sítt seinasta mál í Chelsea troyggjuni. Men nú er tað nógv, ið bendir á, at áleyparin skjótt aftur verður at síggja í Chelsea troyggjuni.
Franska blaðið L’Equipe skrivar í dag at 36 ára gamli áleyparin er á veg aftur til Chelsea, har hann skal gera ein eitt ára sáttmála. Blaðið skrivar eisini, at Didier Drogba hevur við í avtaluni, at hann fær boðið eina uppgávu sum venjari, tá hann gevst at spæla.
Didier Drogba er í løtuni uttan felag, eftir at sáttmálin við turkiska felagið Galatasaray gekk út fyrr í summar.
