Tað eru skoðsmálinum, sum Lisbeth Bügel Madsen, dómari, og Jógvan Páll Lassen, verji, fáa frá Paul Watson.
– Rættarmálið tykist at vera rættvíst, og dómarin tykist vera ópartískur. Advokaturin hjá Sea Shepherd, Jógvan Páll Lassen, er framúrskarandi, hóast hann er fyri grindadrápi. Hann tekur klientar sínar í álvara, hóast grindaviðhaldsfólk háða hann fyri at verja Sea Shepherd fólkini, skrivar Paul Watson á Facebook.
Hann sigur, at meðan hesi seks fólkini vóru í rættinum í gjár, so vóru allir varðpostar hjá Sea Shepherd í Føroyum mannaðir, og bátarnir, sum eftir eru, Brigitte Bardot, Thor, Columbus og Spitfire vóru eisini á varðhaldi kring oyggjarnar.
Tey átta úr bátunum, sum vórðu handtikin, mugu bíða til 25. september at koma fyri rættin.
– Og hesa tíðina hevur løgreglan lagt hald á teir tríggjar skjóttgangandi bátarnar Mike Galesi, BS Sheen og Loke fyri at forða teimum at vera á varðhaldi, skrivar Paul Watson, sum hesaferð er merkiliga eyðmjúkur og ikki bara finnur upp á egnar niðurstøður, sum hann vanliga tekur úr leysum lofti.
