Í samrøðu við Útvarpið hjá Kringvarpinum váttar Bergleif Brimvík, leiðari av kriminaldeildini, at tær DNA-royndirnar, sum kanningarstovan hjá donsku løgregluni hevur kannað, stuðla undir illgrunanum um, at varðhaldsfongslaði maðurin hevur gjørt av við Dánjal Petur Hansen.
Sambært Bergleif Brimvík er málið mest sum liðugt kannað nú, og at rættarmálið er ásett til at byrja fyrstu vikuna av september.
Kriminalpolitiið hevur alla tíðina kent seg sannført um, at prógvini móti varðhaldsfongslaða manninum hava verið nóg sterk tikl at fáa mannin dømdan eisini um tað vísir seg, at líkið av Pidda Hansen ikki kemur fyri ein dag.
At tað ber til at fáa ein ákærdan dømdan uttan at nakað lík fyriliggur, er Peter Lundin eitt gott dømi um. Óbeinleiðis prógv í tí málinum vóru nóg mikið til at fáa drápsmannin dømdan, og í førinum Dánjal Petur Hansen eru umstøðurnar líknandi.
Bergleif Brimvík sigur við Útvarpið, at teir fara at krevja varðhaldsfongslaða mannin at verða stiandi í varðhaldi inntil rættarmálið byrjar.
- Men tað er sjálvandi upp til rættin at gera av, sigur Bergleif Brimvík.
Hann sigur, at umstøður kunnu gera, at teir framhaldandi far at avhoyra fólk, men at teirra arbeiðið nú liggur meira á tað borðið at gera málið klárt at leggja fyri rættin.
