Vit hóma land, men eru als ikki komnir inn á grunt vatn, har sum skerini eru.
Tað staðfestir Kári P. Højgaard, komandi formaður í Sjálvstýrisflokkinum.
Hann vil ikki siga nakað um samráðingarnar, og tá hann verður spurdur um landsstýrisfólk, sigur hann, at teir als ikki eru komnir hartil.
Jørgen Niclasen, formaður í Fólkaflokkinum, er líka hulin.
Vit gjøgnumganga kladduskjalið og peila okkum inn á tungu málini, sigur hann uttan at vilja nevna, hvørji tungu málini eru.
Heldur ikki bar til at fáa viðmerking frá Jenisi av Rana, formanni í Miðflokkinum, honum fingu vit ikki fatur á, meðan Kaj Leo Johannesen, formaður í Sambandsflokkinum og løgmaður, konsekvent ikki tók telefonina hóast nógvar royndir.
Annars sótu flokkarnir hvør sær í morgun og viðgjørdu kladduskjalið til eitt samgonguskjal, og eftir døgurða skulu formenninir í flokkunum hittast til nærri samráðingar.
Løgmaður hevur sagt, at hann væntar samgonguskjalið liðugt týsdagin ella mikudagin.
