Old Trafford, Manchester
Tvær ferðir um árið hava Liverpool viðhaldsfólk møguleikan at minnast gamlar dagar, tá Liverpool var omaná móti Manchester United, men hesa fer fingu Liverpool viðhaldsfólkini einki at gleðast um, tí Dimitar Berbatov átók sær sama leiktlutin, sum Eric Cantona plagdi at hava.
Undan dystinum
Hálvan annan tíma undan fyrsta bríkslinum eru gøturnar kring Old Trafford so smátt við at fyllast. Tað er grátt í veðrinum og hann hevur hug at regna íð so nógv. Barrir og matvøru básar eru góð støð at kroka, meðan løgreglan heldur eygað við at alt gongur sum tað skal. Tó so, har eru fleiri kúllar, sum hava keypt fleiri atgongumerki til dystin og selja tey dýrt á svarta marknaðinum.
150 pund (uml. 1350,-) fyri eitt gott Manchester United atgongumerki ella eitt atgongumerki, sum loyvir tær at sita millum Liverpool viðhaldsfólkini, bjóðar ein 35 til 40 ára gamal maður við hettutroyggju og heldur regnskjólinum langt niður yvir høvdið.
Tey bíligastu liggja um 80 pund (sum svarar til góðar 700 krónur), sigur hann víðari og vísir fram nøkur atgongumerki. Tað er ólógligt at keypa atgongurmerki uttanfyri leikvøllin undan dysti, men tað hendir meiri enn so.
Friðarligt hjá løgregluni
Á øllum síðugøtunum kring Old Trafford er løgreglan á varhaldi. Dystirnir millum Manchester United og Liverpool eru »High Risk« dystir, og tí er nógv løgregla úti á gøtuni. Men sunnudagin er stemningurin avslappaður í økinum rundan um Old Trafford. Í regninum standa tvey løgreglufólk á varhaldi á einum gøtuhorni. Ein ungur hugtungur maður, og ein ung væl útborin og brosandi løgreglukvinna.
Við boygdum ryggi teskar ungi løgreglumaðurin okkurt við starvsfelagan, sum klappar honum á ryggin og tykist siga við hann, at alt helst fer at laga seg. Akkurát hvat hann segði er óvist, men hann tóktist verða keddur um okkurt. Meira var ikki brúk fyri løgregluni undan dystinum.
King Berba
Tað er bara ein kongur í Manchester United, tað er Eric Cantona, men Dimitar Berbatov hevur okkut serligt yvir sær, sum ger at hann minnir nógv um kongin. Hann hevur ein serliga útstráling, hevur altíð tamarhald á tí hann ger, hevur ein avslappaðan, men onkursvega elegantan stíl, klókur við bóltinum, hevur bóltførleika sum fáur og so hevur hann eginleikan at venda einum dysti. Málið til 2-0 eru tað næstan bara hann og Eric Cantona, sum kunnu skora uppá ein so elegantan hátt.
Tað var fult uppiborið, at Manchester United vann dystin, men tað var eisini uppiborið, at tað var Dimitar Berbatov, ið skoraði avgerandi málið. Vónirnar hjá Liverpool at vinna meistaraheitið vóru smáar í fjør, so fyri at varveita støðuna sum mest vinnandi felagið í Onglandi setti Liverpool sítt alit á at Chelsea gjørdust meistarar. Tað er sama skilið í ár!
