Fiskivinna Í gjár og í dag hevur lítið landingarvirksemi verið á landingarmiðstøðini hjá Beta í Saltangará.
Einasta skipið, sum hevur landað hesar báðar dagarnar, er línuskipið Stapin, sum landaði eini 40.000 pund í gjár. Hetta var ein lutfalsliga stuttur túrur, tí Stapin landaði eisini seinasta mánadag.
Seinni í vikuni koma ísfiskatrolararnir Stelkur, Bakur, Rókur og Lerkur væntandi inn at landa. Um bátarnir koma í morgin, hósdagin ella fríggjadagin, var ikki greitt, tá ið vit frættu fyrrapartin í dag.
Í Saltangará verður eisini roknað við, at Polarhav og Stjørnan koma inn at landa seinast í vikuni. Ivasamt er tó, um báðir bátarnir fara at landa í Saltangará.
- Óhugsandi er ikki, at Polarhav og Stjørnan kanska fara at draga túrin út til mánadagin, siga tey í Saltangará.
Góði upsafiskiskapurin, sum partrolararnir høvdu herfyri, er heldur lakari nú, men skipini fáa framvegis væl av fiski.
- Ein vika, sum gevur einum “pari” eini 340.000-360.000 pund, er jú ikki ring, siga tey á Beta.
