24. september lótu hundraðtals av pílagrímum lív í eini vanlukku í samband við árligu pílagrímsferðina hjá muslimum til heilaga býin Mekka. Frá almennari síðu hevur verið mett, at deyðatalið lá um 700 til 800, men í dag boða altjóða fjølmiðlar frá, at veruliga talið er 1.453.
Um tað er satt, so er talan um tvífald so nógv deyð sum áður mett, samstundis sum tað er størsta deyðsvanlukku nakrantíð í samband við pílagrímsferðina. Størsta vanlukka higartil hendi 2. juli 1990, tá 1.426 pílagrímar lótu lív.
Tað er altjóða tíðindastovan AP, ið hevur kunngjørt nýggju tølini. Tíðindastovan hevur roknað seg fram til tølini við at leggja saman almennu deyðatølini frá nítjan ymiskum londum, har pílagrímar komu frá. Saudiarabia tvíheldur enn um, at teirra tal, 769 deyð, er rætt.
Uppteljingin hjá AP vísir, at flest iranar doyðu í vanlukkuni. 465 pílagrímar úr Iran lótu lív, 148 úr Egyptaland og 120 úr Indonesia.
