Bæði liðskipari og leikarar eru á einum málið um, at serbiska stjørnan á miðvøllinum átti reytt kort tíðliga í dystinum, tá hann sparkaði út eftir Jóan Símuni Edmundssyini.
– Tað er ótrúligt, at dómarin ikki gevur honum reytt kort. Men Dejan Stankovic er sjálvandi stóra stjørnan hjá teimum og hann tordi helst ikki at røra hann, sigur Christian L. Holst.
Eisini Fróði Benjaminsen er ivaleysur, Dejan Stankovic skuldi langtsíðani verið blakaður út.
– Eg sá ikki støðuna heilt, men hann skuldi verið blakaður út, sigur Fróði Benjaminsen.
– Sum heilt so haldi eg at dómarin dømdi illa og var vánaligur til at taka konsikventar avgerðir og endaði við at bríksla fyri øllum, sigur Fróði um dømingina.
Dejan Stankovic spældi sín dyst nummar hundrað fyri Jugoslavia og Serbia.
