Føroyskir dartspælarar síggja í flestu førum seg sjálvar sum ítróttarfólk. Í føroyska dart-umhvørvinum hevur eina tíð verið tosað um, at dart átti at verið partur av ÍSF, eins og flestu av hinum ítróttargreinunum eru tað. Síðsta vetur vóru fundir við umsitingina hjá ÍSF og í juni varð so formlig umsókn send starvsnevndini hjá ÍSF við umsókn um upptøku sum menningarsamband undir ÍSF, skrivar Dartsambandið í tíðindaskrivi.
- Starvsnevndin hjá ÍSF játtaði á fundi 30.08.2018 umsóknini um limaskap. Á stovnandi aðalfundi 29.09.2018 var so seinasta stigið tikið at skipað Dartsamband Føroya sum menningarsamband undir ÍSF. Á fundinum vórðu viðtøkur samtyktar og nevnd vald, skrivar Dartsambandið
Dart drúgva søgu í Føroyum
Líka síðan 1990 hava dartkappingar verið í Føroyum. Dart hevði stóra framgongd í 90’unum og tá virksemi var mest, vóru 14 dartfeløg, eitt Dartsamband og fleiri 100 aktivir leikarar. Men mitt í 00 unum dovnaði virksemi, og frá 2008 til 2011 vóru ongar kappingar.
Í 2011 byrjaði Havnar Dartfelag so smátt aftur at skipa fyri kappingum og í 2014 var aftur lív komið í fleiri feløg kring landið. Ein fyribils nevnd varð vald at samskipa kappingar í einum ”Dartsambandi”, sum tó ongantíð varð skipað reint formliga.
Nógvar kappingar síðani 2014
Hóast viðurskiftini Dartsambandinum reint formliga ikki komu uppá pláss fyrr enn nú, so hava fólk ikki ligið á latu síðuni hesi árini síðan 2014. Í dag eru seks virkin dartfeløg kring landið og kappast verður á ymiskan hátt frá september til mai.
Í liðkappingini eru 10 lið, ið kappast yvir 4 vikuskifti. Hesi somu vikuskiftini verður eisini kappast í tvímansleiki. Harumframt eru sjey umfør í kappingini í einmansleiki og alt endar so við einum FM-degi í apríl.
Umframt hesar kappingar skipar Havnar Dartfelag fyri 10 kappingum í blandaðum tvímansleiki og summi feløg skipa av sínum eintingum fyri størri Open-kappingum.
Luttaka nú eisini í altjóða kapping
Á hvørjum ári eru dartspælarar eisini og kappast í størri kappingum í hinum Norðurlondunum og longu komandi vikuskifti fara tríggir av frægastu spælarunum til Íslands at taka lut í PDC Nordic.
- Við limaskapinum í ÍSF verða viðurskiftini hjá føroyskum dart vónandi uppaftur betri, bæði tá hugsað verður um einstaka spælaran og dartfeløgini, eins og rekruttering av nýggjum spælarum og betri skipaðar venjingar eru virkisøki, ið arbeiðast má við, skrivar Dartsambandið at enda.
1. umfar í einstaklingakappingini hevur verið um vikuskiftið. Ein av FM-favorittunum, Remy Gaardlykke, fór avstað við sigrinum. Hann vann 6-4 í finaluni á Bergi Kluftá.
