Í fjør var GPS-útgerð og upptøkutól umborð á sjey donskum fiskibátum Í ár hava manningarnar umborð á 16 donskum fiskibátum gingið við til, at almennu myndugleikarnir seta GPS-útgerð og upptøkutól umborð á hesar 16 fiskibátarnar.
Hetta gevur danska veiðieftirlitinum møguleikan at kanna umleið ein fimtapart av teimum fiskiførunum, ið royna eftir toski í Norðsjónum.
Granskarin, Jørgen Dalskov sigur við DR, at endamálið við GPS-útgerðini og upptøkutólunum er at minka stórliga um talið av fiski, sum verður blakaður út. Útblaking av fiski er yvirhøvur ein stórur trupuleiki í øllum ES-sjógvi.
Mett verður, at undanfarin ár hava danskir fiskimenn blakað út millum 25.000 og 30.000 tons. Nú vóna og vænta eftirlitsmyndugleikarnir, at hetta talið fer at minka stórliga.
Matvørufelagsskapurin hjá ST metir, at fiskimenn kring heimin blaka út fisk, sum árliga hevur eitt virði uppá umleið 50 miljardir amerikanskar dollarar.
