Fótbóltur
Flemming Serritslev hevur hægstu venjaraútbúgving, og hann hevur verið nógv nýttur sum lærari í venjaraútbúgvingunum hjá DBU. Hann hevur eisini drúgvar royndir sum landsliðsvenjari. Øll árini frá 1992 og fram til 2006 var hann á lønarlistanum hjá DBU. Eftir at Danmark á sumri í 1992 hevði vunnið EM kappingina í Svøríki, gjørdist Flemming hjálparvenjari hjá Richard Møller Nielsen. Hetta starvið røkti hann fram til 2000.
Tá Morten Olsen hetta summarið gjørdist danskur landsliðsvenjari, vildi hann hava Michael Laudrup sum hjálparvenjara. Fyrsti dysturin hjá teimum báðum við róðrið varð spældur á Tórsvølli. Tá bleiv Flemming Serritslev venjari hjá U-21 landsliðnum. Hann sat í tí starvinum inntil á sumri í 2006, tá ið hann flutti til Vejle, har hann gjørdist ítróttarstjóri. Steðgurin í barndómsfelagnum var heilt stuttur, tí longu í november hetta sama árið slitnaði samstarvið. Talan segðist vera um samstarvstrupulleikar, sum keldur tætt upp at felagnum siga stóðust av, at ógreiða var um, hvørjar uppgávurnar vóru, sum royndi maðurin í nýggja starvinum skuldi røkja.
Síðstu mánaðirnar hevur hann verið venjari í nigerianska felagnum Nasarawa United.
Royndir úr feløgum
Áðrenn Flemming Serritslev í 1992 tók við starvinum sum hjálparvenjari hjá Richard Møller Nielsen, hevði hann í fleiri ár verið venjari í ymsum feløgum í Danmark. Frá 1981 og fram til 1985 var hann venjari í Ikast FS, sum nú er partur av FCM.
Í 1986 var hann venjari í Kolding IF, sum hann síðst í sjeyti árunum hevði spælt við, og seks ára skeiðið frá 1987 og fram til 1992 vandi hann eitt av stóru feløgunum í Odense. Hann var venjari hjá B1909, sum tað í 1990 eydnaðist honum at flyta úr næstbestu og upp í bestu deildina.
Góðar keldur vilja vera við, at tað er nógv, sum bendir á, at tað verður hesin maðurin, sum næstu árini skal hava ábyrgdina av føroyska landsliðnum.
Fakta um Flemming Serritslev
Føddur 18. februar 1947
Sum spælari
Vejle 1966-1977
Kolding 1978-1980
Sum venjari
Ikast 1981-1985
Kolding 1986
B1909 1987-1992
Danmark, hjálparvenjari 1992-2000
Danmark, U21 2000-2006
Vejle, ítróttastjóri 2006
Nasarawa United (NIG) 2008
