Nú tað er greitt, at Jan Hentze er givin sum altjóða dómari, verður hann heldur ikki fyrstidómari, tá steypafinalurnar í flogbólti verða spældar. Flogbóltssambandið fær í hansara stað ein danskan dómara at koma upp at døma.
Líka síðani Flogbóltssambandið afturi í 2000 fór undir at skipa fyri stóru steypafinaludøgunum hjá bæði kvinnum og monnum, hevur ein altjóða dómari verið fyrstidómari í báðum finalunum. Tað var ein avgerð, táverandi nevnd í Flogbóltssambandinum tók, og núverandi nevnd fylgir sama leisti.
– Fyrstu fimm ferðirnar vóru tað danskarar, ið dømdu, og tað eina árið var tað ein dómari úr Liechtenstein, ið dømdi. Men síðani eg í 2005 bleiv altjóða dómari, havi eg dømt allar finalurnar, sigur Jan Hentze, sum fyri viku síðani kundi fortelja her í blaðnum, at hann nú var givin sum altjóða dómari.
Í hesum sambandi gav hann eisini til kennar, at av tí at tað altíð var ein altjóða dómari, sum dømdi steypafinalurnar sum fyrstidómari, kom tað ikki at verða hansara leiklutur á stóra steypadegnum hjá flogbóltinum, sum er um smáar tvær vikur, leygardagin 15. februar. Hesum boðaði Jan Hentze so eisini Flogbóltssambandinum frá.
– Vit settu okkum beinanvegin í sambandi við danska flogbóltssambandið, sum lovaði at hjálpa okkum við hesum, so tað verður altjóða dómarin, Morten Engborg Klein, sum kemur til Føroya at døma báðar steypafinalurnar um smáar tvær vikur, sigur Jákup Fjalsbak, formaður í Flogbóltssambandinum, ið sostatt heldur fast um leistin við altjóða dómara til steypafinalurnar.
