Vit mugu tryggja at ríkisfelagsskapurin riggar so væl sum gjørligt. Tað segði Sjúrður Skaale, fólkatingsmaður, á fólkatingsins røðarapalli týsagin, tá ið stóra orðaskiftið var áðrenn farið verður í summarfrí.
Hann vísir á, at ein kanning, hann hevur gjørt, vísir, at stór undirtøka er í Føroyum fyri at verða verandi í ríkisfelagsskapinum og tí má hann fáast at virka so væl sum gjørligt.
Kjakið um ríkisfelagsskapin eigur ikki at vera sum ein dystur í tennis, har ein er fyri og hin er ímóti. Hann sigur, at tað er orsøkin til, at allir fyri norðuratlantisku fólkatingslimirnir hava lagt uppskot fram um at taka allar forðingar í ríkisfelagsskapinum burtur. Hann heitti staðiliga á stjórnina um at fara til verka í hesum sambandi.
Sjúrður Skaale heldur ananrs, at danska stjórnin skilir væl føroyska ynski um størri sjálvstýri.
Og tað heldur hann er heilt avgerandi, tí ein stórur meiriluti á føroyskum vil hava eina føroyska grundlóg, ella stjórnarskipan, har føroyingar definera seg sjálvar bæði inneftir og úteftir
Tað gevur føroyingum eitt tryggari grundarlag at standa á enn danska vælvild og tað eigur danska stjórnin og embætisverkið at hava í huganum og taka undir við, tá ið tað málið kemur upp aftur.
- Tað er for býtt at siga, at danska grundlógin longu setir mørkini, soleiðis sum páhaldið úr Danmark er. Øll, sum er køn í statsrætti og fólkarætti siga rætt og slætt, at tað er skeivt. - Tað er ein politisk støða, sum avnoktar veruleikan, tí grundlógin sigur ikki eitt einasta orð um Føroyar og ríkisfelagsskapin, soleiðis er tað, sigur Sjúrður Skaale.
|
