Christiansborg
Fogh vann stríðið um vælferðarsamfelagið ? ella vælferðarsamfelagið tapti. Danmark snaraði til høgru, tá stjórnin hjá Fogh styrktist við tveimum mandatum, sum liggja til høgru fyri Fogh sjálvan.
Fyri fyrstu fer í 21 ár, høvdu Teir Konservativu framgongd, og hetta kemur helst av, at Vinstraflokkurn er farin ov langt til vinstru, og flokkurin hevur tískil mist nakrar veljarar til Teir Konservativu. Men Anders Fogh kann vera glaður, tí tað hann kann missa við at verða so miðjusøkjandi sum hann er, vinnur hann nú við at Teir Konservativu hvødu framgongd. Tað vil siga, at hann kann lata Teir Konservativu taka sær av borgarligu veljarunum, meðan hann sjálvur kann tekkjast miðjuni.
Haraftrat gjørdist Radikala Marianne Jelved stóra sigurskvinnan, men fær einki vald sum so, av tí at hon ikki fekk nógv nógvar mandatar til at hava ein meiriluta saman við Vinstra og Konservatiu ? henni væntaði ein tinglim. RadikaliVinstraflokkurin verður roknaður fyri at vera ein borgarligur flokkur, hóast at hann hevur verið stuðulsflokkur hjá Sosialdemokratunum í fleiri ár. Radikali Vinstraflokkurin er helst eisini farin avstað við nógvum av atkvøðunum hjá Javnaðarflokkinum, tí hesin hevur góðtikið harða útlendingapolitikkin hjá VK stjórnini.
Pia harðari
Pia Kjærsgaard frá Danska Fólkflokkinum koyrdi harðari á útlendingapolitikkin enn nakrantíð áður og vann tveir mandatar. Eitt uppskot hjá Danska Fólkaflokkinum var til dømis, at alt sum myndugleikarnir skriva av leiðbeiningum og annað skrivligt tilfar skal vera á donskum. Hetta hevur skakað til dømis heilsumynduleikarnar, sum ræðast hvat hetta kann føra til av ólukkum. Pia Kjærsgaard hevur somuleiðis nevnt, at markið til Svøríkis eigur at verða latið aftur, so innflytarir í Svøríki ikki skulu koma til Danmarkar, um so var, at teir skuldu fingið tað hugskot, at her var betur at vera. Peter Skaarup, ein av tinglimunum fjá Danska Fólkaflokkinum, hevur haraftrat undir valstríðnum, sum grundgeving fyri at allir útlendingar, ið vera familjusamanførdir, skulu lata eina DNA roynd, sagt, at nógvir útlendingar, sum koma til Danmarkar jú verða brotsmenn seinni í lívinum, og tí er tað gott, at mynduleikarnir hava teirra DNA-profil. Orsøkin til, at hetta málið tók seg upp, var, at ein donsk sjónvarpssending avdúkaði, at nøkur børn eru familjusamanførd við foreldrum, sum í veruleikanum ikki vóru foreldur teirra.
Minni vælferð
Í sjálvum valstríðnum hevur verið ilt at síggja mun á Vinstraflokkinum og Javnðarflokkinum, men hetta merkir ikki, at flokkarnir eru eins ella hava somu dagsskrá. Hans Jørgen Nielsen, lekor á Lærda Háskúlanum í Keypmannahavn, er ikki í iva um, at Anders Fogh Rasmussen hevur eina aðra ætlan við vælferðarsamfelagnum enn Mogens Lykketoft.
- Í so máta arbeiðir Javnaðarflokkurin meira fyri javnaði og líkarætti, sigur hann, og leggur aftrat.
- Eg eri slett ikki í iva um, at Anders Fogh er meira liberalur, enn hann sigur, men eg haldi, at hann er pragmatikari, og arbeiðir eftir, hvat hann veit kann lata seg gera politiskt. Tó fer hann altíð at velja tað meira liberalu loysnina, tá hann skal taka avgerðir, sigur Hans Jørgen Nielsen. Hann heldur somuleiðis, at um Fogh verður sitandi í 6-7 ár aftrat, verður danska samfelagið ikki tað vælferðarsamfelag, sum vit kenna tað í dag.
