Flestu danir vilja hava somu atgongd til vælferðarsamfelagið, sum teir eru uppvaksnir við og hava viðvirkað til, og tí er ein meiriluti av fólkinum ímóti at leggja nýtslugjøld á ymsar vælferðartænastur.
Ein meiningakanning, sum Politiken og TV2 hava latið gera, vísir, at 64 prosent av teimum spurdu eru ímóti at rinda nýtslugjald fyri eitt nú sjúkrahúsviðgerð, bókalán ella framhaldsútbúgvingar.
Í somu kanning siga 72 prosent, at Danmark eigur at varðveita eina vælferðarskipan, har allir borgarar - uttan mun til inntøku - hava atgongd til somu vælferðartænastur, og at tær í høvuðsheitum skulu fíggjast ígjøgnum skattin.
Lars Bo Kaspersen, professari á handilsháskúlanum í Keypmannahavn, sigur við Politiken, at kanningin vísir, at danir vilja varðveita tað, sum teir eru vanir við.
