Nú er greitt, at Danmark skal spæla ímóti Ungarn í fjórðingsfinaluni í HM-kappingini í manshondbólti. Dysturin verður mikukvøldið.
Ungarn tryggjaði sær í kvøld pláss í fjórðingsfinaluni við at vinna á Póllandi. Dysturin bleiv ongantíð spennandi, og í seinna hálvleiki var stórur munur á liðunum. Tað var kortini ikki minst góðum málmansspæli hjá ungarska Roland Mikler fyri at takka, at Ungarn at enda vann tryggan sigur 27-19.
Í teirri seinastu áttapartafinaluni spældu Kroatia og Hvítarussland, og hendan dystin vunnu teir kroatisku favorittarnir lættliga.Úrslitið gjørdist 33-24.
Kroatia skal í fjórðingsfinaluni møta Fraklandi, og viðmerkjarar eru á einum máli um, at hetta verður eitt brak av einum hondbóltsdysti.
Fjórðingsfinalurnar í HM eru sostatt hesar:
Danmark - Ungarn
Týskland - Spania
Kroatia - Frakland
Russland - Slovenia
Allir dystirnir verða mikukvøldið.
