Landsstýriskvinnan í mentamálum, Helena Dam á Neystabø, hevur gjørt av at seta á stovn eina málrøktarvirðisløn at lata einstaklingi, stovni ella felagi, ið hevur verið við til at røkja og ríka føroyska málið Málrøktarvirðislønin, ið er kr. 40.000, verður handað tann 25. mars, ið samstundis verður útnevndur sum Dagur málsins. Dagurin er føðingardagur V.U. Hammershaimbs.
Á fyrsta Degi málsins verður Málrøktarvirðislønin handað á almennum tiltaki í auluni í Studentaskúlanum í Hoydølum. Umframt sjálva virðislønarhandanina fevnir skráin um kvøður og tónleik.
Umframt at heiðra móttakaran er virðislønin við til at varpa ljós á móðurmálið og støðu tess í samfelagnum. Føroyska málnevndin og fyrrverandi Málstevnunevndin hava mælt landsstýriskvinnuni til hesi átøk, sum nú verða sýnd í verki.
-Dagur málsins kann vera við til at seta móðurmálið í miðdepilin og skapa tilvit um nýtslu og menning av málinum. Um myndugleikar, skúlar, stovnar, feløg, fjølmiðlar og almenningurin taka undir við at hátíðarhalda 25. mars, er góður møguleiki fyri at skapa størri málsligt tilvit og at lýsa, viðgera og kjakast um málslig fyribrigdi ella evni á fjølbroyttan hátt og úr ymsum sjónarhornum, sigur landsstýriskvinnan í Mentamálum, Helena Dam á Neystabø í dag.
