Í lesarabrævi rør Tjóðveldi upp undir, at tað eru pengar, sum mangla til at útbyggja dagstovnin á Argjahamri, men tað er ikki rætt.
30 mió. kr. standa á fíggjarætlanini fyri 2022, og tá vit kenna endaliga kostnaðin verður rætta upphæddin avsett til verkætlanina.
Arbeiðið við at útbyggja dagstovnin á Argjahamri er í góðum hondum, og hann verður útbygdur, men hann er eitt sindur seinkaður.
Orsøkin til seinkanina er, at fyriliggjandi uppskot skuldi tilpassast tí stóru útstykking, sum nú er farin av bakkastokki á Argjum.
Tað er umráðandi, at arbeiðið við útstykkingini at flyta vegin út á Glyvursnes niðaneftir og útbyggingin av dagstovninum, sampakkar og verður tilpassað fyri at optimera virksemi á staðnum, og soleiðis fáa sum mest fyri hvørja krónu.
Dagstovnurin á Argjum verður útbygdur til økta fólkatalið, sum verður á Argjum.
Um alt gongur eftir ætlan, so kann verkætlanin ella sjálv byggingin fara í gongd longu seinni í ár ella allar fyrst í komandi ári.
Annfinn Brekkstein
formaður í Mentamálanevndini, Tórshavnar Kommuna
