Dagsskráin sett av nýggjum

Tað hevur ikki verið á hvørjum ári, at Vestmanna og Klaksvík hava vunnið kvinnukappingarnar á Norðoya­stevnu, men soleiðis var tað hesa ferð.
Fínu hagtølini á drekin.fo siga, at Páll Fangi hevur ikki vunnið kapp­ingina millum 6-mannafør við kvinnum síðani 2001. Hetta mundi vera besta kappingarárið nakrantíð hjá Klaksvíkar Róðrarfelag, og tá vunnu kvinnurnar á Páll Fanga bæði á Norðoyastevnu og FM kapp­ingina.
Síðani hevur tað gingið meiri striltið hjá Páll Fanga, sum viðhvørt hevur tikið lut, og viðhvørt hevur einki verið at sæð til Páll Fanga.
Einasta undantakið var í 2009, tá ið Páll Fangi vann kvinnuróðurin á Vestanstevnu. Sigurin var rættuliga óvæntaður, tí Gongurólvur vann allar hinar seks róðrarnar og harvið FM heitið.
Uppaftur longri er tað síðani, at Havfrúgvin úr Vestmanna vann ein róður í kappingini millum 5-manna­før við kvinnum. Tað eru trettan ár síðani, at Havfrúgvin kom fyrst á mál. Í 1999 vann Havfrúgvin tríggjar róðrar og eisini FM heitið. Ein av sigrunum varð vunnin á Norð­oya­stevnu. Hetta er einasta ferðin yvirhøvur, at Havfrúgvin við kvinn­um hevur vunnið FM.
Norðoyatevnuróðurin boðaði frá, at tær úr Vestmanna ætla at bjóða av í FM kappingini. Talan var um rættuliga tætta kapping við Blik av Argjum. Bátarnir stevndu stavn um stavn fram ímóti málinum, og Havfrúgvin var bara ein lítlan hálvan skut fremri.
Hinir tríggir bátarnir – Firvaldur, Strípan og Falkur – vóru leingi væl við, men tá ið tað leið fram ímóti endaspurtinum var tað bara kapping millum Blik og Havfrúnna, sum fyri fyrstu ferð í trettan ár fekk handað steyp og skreyt fyri at hava vunnið ein róður.

Framúr tíð
Klaksvíkingar og norðoyingar høvdu vónað, at 10-mannafarið Klaks­víkingur skuldi syrgja fyri kapp­róðrarliga gullinum til heima­fólk­ið á Norðoyastevnu í ár.
At tað eisini skuldi eydnast kvinn­unum á Páll Fanga at vinna, var eitt sindur óvæntað.
Hvessingur misti FM heitið á Ólavsøku í fjør, og tær í Sunda­lag­num hava verið roknaðar sum kandidatur til FM heitið í ár.
Tað er framvegis møguleiki fyri, at Hvessingur skal vinna FM. Men so skal nógv venda øðrvísi næstu ferðirnar, enn tað gjørdi í Klaksvík leygardagin.
Páll Fangi fleyg avstað, og Hvessingur og Rádni úr Fuglafirði sóu ikki aftur í hælaferðina á bát­inum, sum róði í heimasjógvi. Páll Fangi økti stútt og støðugt um leiðsl­una, og tá ið hann spurtaði inn móti málinum, var fjarstøðan aftur til Hvessing meiri enn tríggjar báts­longdir.
Fimm ferðir hevur Páll Fangi vunnið FM. Í 1986, 1987, 1989, 1990 og í 2001.
Nú hava tær úr Klaksvík um­borð á Páll Fanga og tær úr Vest­manna umborð á Havfrúnni sett dagsskránna í kappingunum mill­um kvinnubátarnar!