Nýggja felagið eitur GM Daewoo Auto & Technology Company. Hetta felag hevur yvirtikið verksmiðjurnar og eina menningarmiðstøð í Suðurkorea og eina stóra eykalutagoymslu í Hollandi.
Fyrsti bilurin í nýggja samstarvinum er Daewoo Kalos, ið nú kemur á marknaðin. Kalos er teknaður av italska bildesignar-anum Giugiaro. Talan er um ein bil í umleið somu stødd sum t.d. Citroën C3 og Skoda Fabia við smartum og nútímans linjum.
Motorurin er ein 1,4 litur 4 syl. bensin við 83 hk. Bilurin kemur í fyrstu atløgu sum hatchback við 5 hurðum, seinni kemur ein útgáva við 3 hurðum og ein sedan.
Umframt Kalos kemur ein heilt nýggjur Daewoo Evanda, ið avloysir fyri tann størra Daewoo Leganza. Tann bilurin er í stødd við Ford Mondeo og VW Passat. Uttanfyri Evropa eitur tann bilurin Daewoo Magnus. Í oktober kemur ein avloysari fyri Daewoo Nubira. Kalos og Evanda koma á føroyska marknaðin í apríl/mai, sigur Jens Petur Jensen sølumaður hjá P/F Esmar Simonsen, Daewoo umboðnum á Kambsdali.
