Amerikanska rúmdarumsitingin NASA hevur higartil nýtt eina milliard krónur til arbeiðið at leita eftir lutum av rúmdarferjuni Columbiu, sum sprongdist uppi yvir Texas tann 1. februar.
NASA kunngjørdi í gjár, at higartil hevur arbeiðið at savna vrakpettini kostað góðar 137 milliónir dollarar, og at útreiðslurnar veksa hvønn dag. Tað hevur víst seg, at vrakpetti av Columbiu duttu niður í einum ógvuliga stórum øki, men meginparturin er kortini funnin aftur í Texas og Louisiana.
Síðani miðskeiðis í februar hava meiri enn 3.000 fólk leitað eftir vrakpettum. Harumframt hevur NASA nýtt 32 tyrlur, níggju flogfør, sjey bátar og nógvar kavarar í leitingini. Higartil hava leitingarfólkini funnið meiri enn 22.100 vrakpetti av Columbiu.
