Tey, sum eru í Norðuritalia og ferðast, eiga at skunda sær heim. Soleiðis ljóða ráðini frá myndugleikunum í dag.
Myndugleikarnir í Italia hava nú hert munandi um tiltøkini, sum eru sett í verk fyri at forða fyri corona-smittan breiðir seg.
Í hesum sambandi hava myndugleikarnir stongt markið til tað mesta av Norðuritalia og sett ein stóran part av økinum í sóttarverju. Sostatt eru heili 15 milliónir italienarar settir í sóttarhald.
Hetta er galdandi fyri landspartarnar, Emilia-Romagna, Lombardí, Piemonte, Veneto, Marche og Valle d'Aosta.
Italia er tað landið Í Evropa, sum er nógv harðast rakt av corona-smittuni. Nú er staðfest, at 7.375 italienarar eru smittaðir, og 355 fólk eru deyð, og sostatt eru 100 fólk deyð bara hetta seinasta samdøgurið
Føroyskir myndugleikar fylgja neyvt tilmælunum frá Uttanríkisráðnum í Danmark, og tey mæla øllum, sum eru stødd í umrøddu pørtum í Norðuritalia um at sleppa sær heim sum skjótast.
Uttanríkisráðið hevur verið í sambandi við myndugleikarnir í Italia og tey eru sinnað at lata danskar ríkisborgarar, og onnur ferðafólk, sleppa heimaftur – men treytin er, at teir ikki eru smittaðir.
Tey, sum vilja av landinum, verða kannað, og hava tey eingi sjúkutekin, sleppa tey av landinum.
Erik Brøgger Rasmussen, stjóri í borgaratænastuni í Uttanríkisráðnum, sigur við Tv2 í dag, at enn er óvist, hvussu leingi hetta tilboðið stendur við.
Og tí heitir hann á tey, sum eru stødd í Norðuritalia um at pakka sær kuffertið sum skjótast og at sleppa sær heim aftur.
Tey, sum eru í egnum bili skulu bara skunda sær at fylla viðførisrúmið og sleppa sær norður yvir aftur. Tey, sum heru komin við flogfarið, ella ferðasmiði, skulu seta seg í samband við tey um at sleppa heim aftur sum skjótast.
Tá ið tey eru komin heim, eiga tey at fara í sóttarhald í tvær vikur, men er talan um starvsfólk í heilsuverkinum ella á sosiala økinum, SKULU tey vera heima í tvær vikur eftir at tey eru komin heim.
