Longu fyri fleiri vikum síðani sendi amerikanska fregnartænastan CIA menn til Libya at savna upplýsingar. Agentarnir skuldu savna upplýsingar um herstøðir og onnur mál, sum skuldu bumbast, um altjóða samfelagið gjørdi av at leggja seg út í ófriðin.
Tað skrivar New York Times, sum sigur seg hava tíðindini frá týðandi keldum í stjórnini í Washington.
Sambært blaðnum var tað Barack Obama, forseti, sum gav CIA heimild at senda agentar til Libya. Tað var kortini ikki bara forsetin, sum visti um tiltakið, tí reglurnar siga, at forsetin skal kunna eina serliga nevnd hjá Kongressini um avgerð sína.
New York Times skrivar, at heimildin frá forsetanum ruddar eisini slóð fyri, at USA kann lata uppreistrarmonnunum í Libya vápn, men Hvítu Húsini hava fleiri ferðir sagt, at eingin avgerð er tikin um at lata uppreistrarmonnunum vápn.
