Kristján Guðmundsson var ikki leingi venjari hjá HB. Eftir at hann hevði fingið sekkin, fór hann aftur til Íslands, har hann nú er venjari hjá Vali.
Men hóast úrtøkan í HB ikki var tann, sum hann hevði vónað, so tykist tað sum um mánaðirnir í Føroyum ikki vóru til fánýtis.
Fyrr í dag kom tað fram, at Valur hevur skrivað tvey ára sáttmála við Pól Jóhannus Justinussen í B68.
Í kvøld veit íslendska Morgunblaðið at siga, at Valur er áhugað í einum øðrum føroyskum spælara.
Talan er um Christian R. Mouritsen í B36. 22 ára gamli framrættaði spælarin, sum í ár var liðformaður á U-21 landsliðnum, og sum hevur spælt seks ferðir á a-landsliðnum, skal til Val í Reykjavík, har tað í fyrsta umfari verður talan um royndarvenjing.
Hetta er ikki fyrsta ferðin, at Christian R. Mouritsen fer at royna seg uttanlands. Hann hevur áður verið yrkisspælari í Manchester City.
Í farna kappingarári spældi Christian R. Mouritsen 26 dystir í Vodafonedeildini, og saman við Jákupi á Borg og Hjalgrími Elttør var hann B36 toppskjútti við sjey málum.
