Europa League finala
Chelsea - Arsenal 4-1 (0-0)
1-0 Olivier Giroud 48 min
2-0 Pedro 60 mim
3-0 Eden Hazard (br.) 63 min
3-1 Alex Iwobi 68 min
4-1 Eden Hazard 71 min
Í kvøld var finalan í ársins Europa League kapping leikt í Baku í Aserbadjan. Umframt steypið var eisini eitt atgongumerki till Champions League kappingina næsta ár upp á spæl. Hetta atgongumerkið hevði Chelsea longu fingið hendur á, so tað var helst Arsenal, ið hevði størri tørv á einum sigri.
Arsenal vantaði sín armenska leikara, Henrikh Mykhitaryan, ið ikki var farin við liðnum, orsaka av stríði ímillum Armenia og Aserbadjan.
Tað leikaði javnt á í fyrra hálvleiki, har Arsenal var eitt sindur nærri møguleikum enn Chelsea, ið kortini eisini trýsti í løtum.
Eftir 17 minuttir vildi Alexandre Lacasette hava brotsspark, tá ið prikaði bóltin fram við málverjan og síðani fór um koll. Men dómarin metti ikki at nakað brot var framt, og VAR gav honum rætt.
Eftir 27 minuttir endaði eitt Arsenaltrýst við at Granit Xhaka tók ein møguleika úr fjarstøðu, men harða skotið streifaði tvørtræið og fór upp um málið.
Eftir 33 minuttir var Chelsea nær við. Emerson gjørdist rættiliga fríur vinstrumegin málið, men Petr Cech stóð fyri.
Spælið flutti seg nú skjótt aftur og fram ímillum báðar brotsteigarnar, og tað gjørdist av álvara vandamikið eftir 39 minuttum, tá ið fyrrverandi Arsenal-leikarin, Olivier Giroud fekk skotið beint uttanfyri brotssteigin, men fyrrverandi Chelsea-málverjin, Petr Cech bjargaði Arsenal. Tí var framvegis 0-0 í steðginum.
Men Chelsea og Giroud vóru til reiðar frá fyrsta bríksli í seinna hálvleiki.
Fyrst vildi Chelsea hava brotsspark, tá ið Eden Hazard rann saman við ein verjuleikara. Einki varð dómt, og bólturin endaði hjá Olivier Giroud og skotið hjá honum fór til horna. Chelsea tók hornasparkið stutt úr høgru og spældi bóltin yvir í vinstru síðu haðani eitt lágt innlegg kom inn fyri.
Giroud tveitti seg eftir bóltinum, og rakti hann avbera væl við høvdinum. So væl at bólturin fór endaði niðri í vinstra málhornið uttan møguleika fyri málverjan, og so var 1-0 til Chelsea eftir 48 minuttir.
Arsenal legði trýst á eftir hetta, men eftir ein knappan tíma setti Chelsea ferð á. Eden Hazard fekk bóltin í góðari støðu í vinstru, og sá Pedro renna seg púra leysan mitt fyri. Bólturin var sendur á rætta stað, og Pedro takkaði fyri við at gera støðuna til 2-0.
So mátti Arsenal longur fram á vøllin, og hesum revsaði Chelsea alt fyri eitt. Tríggjar minuttir eftir seinasta málið fekk Chelsea brotsspark. Arsenal-verjan fekk bóltin av Hazard, men Pedro var fyrstur á honum, slapp fram við einum leikara og spældi Giroud leysan í brotssteiginum. Fyrrverandi Arsenal-áleyparin fekk ikki skot á hesaferð, tí hann var koyrdur um koll og so var brotsspark.
Hazard var tryggur og so var 3-0.
Tað tóktist sum ein greið avgerð, men Arsenal svaraði skjótt aftur, og tað var við einari perlu. Bólturin fór aftur og fram í brotssteiginum hjá Chelsea áðrenn hann kom út til innskifta Alex Iwobi, sum tók møguleikan við einum fluktara uttan fyri brotssteigin. Iwobi rakti bóltin á besta hátt, og so fleyg hann yvir í handaru síðu av málinum.
3-1 eftir 68 minuttir, og ein vón birtist í Arsenal.
Men tríggjar minuttir seinni sløknaði vónin hjá Arsenal, tá ið ein mistur bóltur á egnari hálvu var revsaður á harðasta hátt. Hazard og Giroud vóru einsamallir ímóti Arsenal-verjuni, men teir fingu í felag flott spælt Hazard ígjøgnum og so var 4-1.
Tað, ið restaði í av dystinum var Chelsea fleiri ferðir nær við, men Petr Cech forðaði fyri einari verðuligari eyðmýking. Arsenal hevði eisini onkrar møguleikar at minka um munin eftir gott uppspæl í fleiri førum frá Iwobi. Men neyvleikin vantaði, og so kundu Chelsea-fjepparar í góðum hýri bíða eftir at dómarin skuldi floyta av og staðfesta at Chelsea hevur vunnið Europa League 2019
